ഗ്രീൻനഗർ റസിഡന്‍റ്സ് അസോസിയേഷൻ നിര്‍മ്മിച്ച്‌ നല്‍കിയ അം ഗൻവാടി കെട്ടിടം കുഞ്ഞുങ്ങള്‍ക്ക്‌ സമര്‍പ്പിച്ചു
..........................................................................................................................................
കോന്നി പഞ്ചായത്ത് 16ാം വാർഡിലെ അംഗൻവാടി കെട്ടിടത്തിന്‍റെ തകർച്ച കണ്ടറിഞ്ഞ ഗ്രാമീണ കൂട്ടായ്മ മുന്‍ കയ്യെടുത്തതോടെ കുരുന്നുകള്‍ക്ക് അക്ഷരത്തിന്റെ ആദ്യ പാഠം നുകരാന്‍ സൌകര്യമായി . കെട്ടിടത്തിന്‍റെ ഉത്ഘാടനം അടൂർ പ്രകാശ് എംഎൽഎ നിർവഹിച്ചു.
കോന്നി ഗ്രീൻനഗർ റസിഡന്‍റ്സ് അസോസിയേഷൻ മുന്‍ കയ്യെടുത്ത് നിര്‍മ്മിച്ച കെട്ടിടത്തില്‍ ഇനി കുരുന്നുകള്‍ സൌകര്യമായി പഠിക്കും . സംയോജിത ശിശുവികസന കേന്ദ്രം ഇനി 18 വയസിൽ താഴെയുള്ള പെണ്‍കുട്ടികളുടെ ആരോഗ്യസംരക്ഷണം ഉൾപ്പെടെയുള്ള വിഷയങ്ങളിൽ ശ്രദ്ധ കേന്ദ്രീകരിക്കുക കൂടി ചെയ്യും . കൂടാതെ വാർഡിലെ അമ്മമാരുടെയും ഗർഭിണികളുടെയും പരിരക്ഷയും കേന്ദ്രത്തിന്‍റെ ചുമതലയിലാകും.
1000 ചതുരശ്ര അടി വിസ്തൃതിയിൽ ആധുനിക സൗകര്യങ്ങളോടെയാണ് കെട്ടിടം പൂർത്തീകരിച്ചത്. നേരത്തെ ഒറ്റമുറിയിൽ മണ്കട്ടകൊണ്ട് നിർമിച്ചിരുന്ന കെട്ടിടത്തിന്‍റെ സ്ഥാനത്താണ് പുതിയ കെട്ടിടം. 1993 മുതൽ ആംഗൻവാടി പ്രവർത്തിച്ചിരുന്നു. കെട്ടിടത്തിന്‍റെ ശോച്യാവസ്ഥ കാരണം മൂന്നു കുട്ടികൾ മാത്രമായി. മങ്ങാരം വാർഡിൽ ആംഗൻവാടി വേണ്ടെന്ന നിലയിലേക്ക് ആലോചന നടക്കുന്പോഴാണ് റസിഡന്‍റ്സ് അസോസിയേഷൻ ഇടപെടുന്നത്. നിലവിലുണ്ടായിരുന്ന അംഗൻവാടിയോടു ചേർന്ന് ലഭ്യമായ ഏഴ് സെന്‍റു സ്ഥലത്താണ് പുതിയ കെട്ടിടം നിർമിച്ചിരിക്കുന്നത്.
കോണ്ഫറൻസ് ഹാൾ, പഠനമുറി, കുട്ടികൾക്ക് വിശ്രമമുറി, അറ്റാച്ച്ഡ് ബാത്ത്റൂം, ആധുനിക പാചകപ്പുര, ഷട്ടിൽ കോർട്ട്, കുട്ടികൾക്ക് പാർക്ക്, പൂന്തോട്ടം, ജൈവകൃഷി എന്നിവയെല്ലാംഒരുക്കി . അസോസിയേഷനിലെ 60 ഓളം കുടുംബങ്ങളിൽ നിന്നും ലഭ്യമായ സാന്പത്തിക സഹായവും സാമഗ്രികളും ഉപയോഗിച്ചാണ് കെട്ടിടം പൂർത്തീകരിച്ചത്. പുറത്തുനിന്ന് അഭ്യുദയകാംക്ഷികളും സഹായിച്ചു. സർക്കാർ, തദ്ദേശസ്ഥാപന ഫണ്ടുകൾ യാതൊന്നുമില്ലാതെയാണ് കെട്ടിടം പൂർത്തീകരിച്ചിരിക്കുന്നത്. കെട്ടിടം ഉദ്ഘാടനത്തോടെ ഐസിഡിഎസിനു കൈമാറുകയും ചെയ്യും.പൂർണമായി പരിസ്ഥിതി സൗഹാർദപരമായാണ് കെട്ടിടം നിർമിച്ചിരിക്കുന്നത്. അസോസിയേഷൻ മുൻകൈയെടുത്ത് കുട്ടികൾക്ക് യൂണിഫോം, തിരിച്ചറിയൽ കാർഡ് എന്നിവയും നല്‍കും .സംയോജിത ശിശുവികസന പദ്ധതിയുടെ ഭാഗമായി ആംഗൻവാടി മുറ്റത്ത് അക്ഷയപാത്രവും സ്ഥാപിച്ചു.
മുൻ എംഎൽഎ എ. പത്മകുമാർ മുഖ്യാതിഥിയായി . ബ്ലോക്ക് പഞ്ചായത്ത് പ്രസിഡന്‍റ് കോന്നിയൂർ പി.കെ, ഗ്രാമപഞ്ചായത്ത് പ്രസിഡന്‍റ് എം. രജനി, ബ്ലോക്ക് പഞ്ചായത്തംഗം റോജി ഏബ്രഹാം, ഗ്രാമപഞ്ചായത്തംഗങ്ങളായ ലൈല, ശോഭാ മുരളി, ഐസിഡിഎസ് ഓഫീസർ എം. അബ്ബാസ്, കോന്നി ഡിഎഫ്ഒ മനേഷ് കുമാർ,മുൻ ഗ്രാമപഞ്ചായത്ത് പ്രസിഡന്‍റുമാരായ ശ്യാംലാൽ, ബാബു വെളിയത്ത പ്രമാടം ഗ്രാമപഞ്ചായത്ത് സെക്രട്ടറി രാധാകൃഷ്ണൻ നായർ, പ്രസന്നകുമാർ കുരട്ടിയിൽ, ലൈല, രതീഷ് മുരുപ്പേൽ, ശാന്തി തുടങ്ങിയവർ സംസാരിച്ചു . അസോസിയേഷൻ പ്രസിഡന്‍റ് വി.ബി. ശ്രീനിവാസൻ, സെക്രട്ടറി ജഗീഷ് ബാബു, ട്രഷറാർ രാജീവ് കൊട്ടാരത്തിൽ തുടങ്ങിയവരുടെ നേതൃത്വത്തിലാണ് നിർമാണ പ്രവർത്തനങ്ങൾ പൂർത്തീകരിച്ചത്.
Comments
Post a Comment